मुंबई: महाराष्ट्रातील हवामानात सध्या कमालीचे चढ-उतार पाहायला मिळत असून राज्याला एकाच वेळी उष्णतेची लाट आणि अवकाळी पाऊस अशा दुहेरी संकटाचा सामना करावा लागत आहे. इराण आणि पाकिस्तानच्या भागातून येणाऱ्या कोरड्या आणि उष्ण वाऱ्यांमुळे मध्य भारत तसेच महाराष्ट्रात प्री-मान्सून हिटवेव्ह (उष्णतेची लाट) सक्रिय झाली आहे. यामुळे विदर्भ आणि मराठवाड्यातील तापमान झपाट्याने वाढले असून काही जिल्ह्यांमध्ये पारा ४५ अंश सेल्सिअसच्या पुढे गेला आहे. दुसरीकडे, अरबी समुद्रातील वातावरणीय बदलांमुळे पश्चिम किनारपट्टी आणि दक्षिण महाराष्ट्रात ढगाळ हवामान निर्माण झाले असून पावसाची शक्यता वर्तवण्यात आली आहे.

विदर्भ आणि मराठवाडा: उष्णतेचा भीषण तडाखा

राज्यातील विदर्भ आणि मराठवाडा या दोन्ही विभागांमध्ये उन्हाचा तडाखा अत्यंत तीव्र झाला आहे. अकोला, चंद्रपूर, नागपूर, अमरावती, हिंगोली आणि परभणी या जिल्ह्यांमध्ये उष्णतेच्या लाटेमुळे नागरिकांच्या अंगाची लाहीलाही होत आहे. शुष्क वाऱ्यांमुळे विदर्भातील काही भागांत तापमान ४५ ते ४६ अंश सेल्सिअसच्या जवळ पोहोचले आहे. हवामान विभागाने या भागातील १० जिल्ह्यांसाठी 'यलो अलर्ट' जारी केला असून दुपारी नागरिकांना विनाकारण बाहेर न पडण्याचे आवाहन केले आहे.

मुंबई आणि कोकण विभाग: ढगाळ वातावरण आणि पावसाचा अंदाज

विदर्भाच्या अगदी उलट परिस्थिती राज्याच्या पश्चिम किनारपट्टीवर पाहायला मिळत आहे. मुंबई, ठाणे, पालघर, रायगड, रत्नागिरी आणि सिंधुदुर्ग या कोकण पट्ट्यात १८ ते २० मे दरम्यान तुरळक ठिकाणी हलक्या ते मध्यम स्वरूपाच्या अवकाळी पावसाचा अंदाज आहे. किनारपट्टीच्या भागात आर्द्रता वाढल्याने उकाडा असह्य झाला असून, संध्याकाळच्या सुमारास मेघगर्जनेसह पाऊस पडण्याची शक्यता आहे. यामुळे किनारपट्टीवरील नागरिकांना उष्णतेपासून काही प्रमाणात दिलासा मिळू शकतो.

मध्य महाराष्ट्र: काही भागात कोरडे हवामान तर काही ठिकाणी अलर्ट

मध्य महाराष्ट्रातील धुळे, नंदुरबार, जळगाव आणि नाशिक या जिल्ह्यांमध्ये हवामान मुख्यत्वे कोरडे आणि उष्ण राहण्याचा अंदाज आहे. मात्र, दुसरीकडे पुणे, अहिल्यानगर, सातारा, सांगली आणि कोल्हापूर या जिल्ह्यांमध्ये प्रादेशिक हवामान बदल आणि स्थानिक ढगांच्या निर्मितीमुळे अवकाळी पावसाची शक्यता वर्तवण्यात आली आहे. लातूर आणि धाराशिव जिल्ह्यांमध्येही पावसाचा यलो अलर्ट देण्यात आला असून येथे सोसाट्याचा वारा वाहण्याची शक्यता आहे.

: 19 मे रोजी कशी असेल परिस्थिती

हवामान विभागाच्या ताज्या अंदाजानुसार, उद्या म्हणजेच १९ मे रोजी देखील राज्यात ही दुहेरी हवामानाची स्थिती कायम राहणार आहे. विदर्भ आणि मराठवाड्यातील उष्णतेची लाट पुढील ४८ तास अशीच तीव्र राहील आणि तापमानात मोठी घट होण्याची शक्यता नाही. तर मुंबई, पुणे आणि कोकणातील काही भागांमध्ये उद्याही अंशतः ढगाळ वातावरण राहून दुपारनंतर किंवा संध्याकाळी विजांच्या कडकडाटासह हलका पाऊस पडू शकतो. ग्रामीण भागात शेतकऱ्यांना काढणी केलेला शेतीमाल सुरक्षित स्थळी ठेवण्याचा सल्ला देण्यात आला आहे.